作者：李榕樟

夜，是一匹浸了浓墨个绸缎，覆盖勒1947年暑气未散个上海滩。福煦路（今朝个延安中路）西段个霓虹碎金一样泼洒勒勒柏油路面浪，金都大戏院（今延安中路542号）个霓虹招牌彻夜流转，拿热映影片《龙凤花烛》个巨幅剧照，映得勒夜色里漾着暧昧又苍凉个光。呒没人会得想着，搿座矗立勒沪西个装饰艺术派（ArtDeco）地标，会勒今夜成为血腥风暴个中心——宪警积年个恩怨，因为一张戏票一记头引爆，7名警察、4名无辜路人总共11条人性命倒勒戏院光洁个大理石地面浪。而搿座见证了十里洋场繁华个建筑，伊最终个退场，还囥勒海一场火灾留下个余烬搭怅惘。 

华灯初上：娱乐地标个黄金时代

金都大戏院，是民国上海西区个娱乐亮色。1940年圣诞前，著名歌星、影星周璇为戏院剪彩开幕，首映由国华影业公司出品个经典影片《西厢记》。搿座矗立勒福煦路（今延安中路）搭同孚路（今石门一路）交叉路口个建筑，一经亮相就跻身沪上热门影剧院之列，周边商铺、舞厅、饭店密密稝稝；建筑周身以几何浮雕搭利落线条勾勒轮廓，像一枚精切个宝石，镶嵌勒流光溢彩个十里洋场。迭只戏院内部格局精巧，三层递进式个池座搭楼座好容纳大约摸1200名观众，舞台搭仔放映设备勒当时个上海属于一流水准，更配备了当时少见个先进冷气系统。勒酷暑难熬个旧上海，埃个丝丝凉意成了阶层搭身份个隐形通行证，也让搿搭成了老上海人心里向无可替代个消暑搭娱乐胜地。

1947年7月，冯喆搭陈燕燕主演个《龙凤花烛》勒此地热映，一段辰光风头十足。戏院门口头个黄包车夫日夜穿梭，票房前头买票个队伍弯弯曲曲排成长龙，霓虹灯个光影拿夜色揉成沸腾个欲望。搿搭从来勿只是单纯个看电影个场所，更是民国上海社交个微缩图景：达官显贵个专属包厢、买办阶级落座个楼座、平民百姓聚集个池座，勿同阶层勒此地交会，勾兑出独属于埃个时代个浮靡搭亢奋，场场座无虚席个戏院，尽展魔都个繁华搭仔喧嚣。

一张戏票引爆个宪警血案

迭个辰光，上海市警察局新成分局警员卢运亨巡逻经过，只看见人群当中一个戴仔中尉军衔个宪兵军官正勒推搡一个年轻人——张镛根凭自家有宪兵帮腔，态度更加傲慢，也更加激起龚复柳个勿满。卢运亨马上去劝解，而迭个宪兵中尉正是驻院宪兵23团8连中尉排长李豫泰，伊看见警察轧进来，邪气勿买账，两家头当场发生争吵。迭个辰光，李豫泰动手打了卢运亨两只耳光，卢运亨立时回敬伊一脚，跟牢仔李豫泰怂恿身边两个宪兵用枪托拿卢运亨打瘫勒地浪，还拿伊关进戏院二楼小间，打得伊昏死过去。之后，李豫泰一方面打电话报告康脑脱路（今康定路）770号宪兵队部，还瞎编讲警察干涉公务、殴打宪兵，请求派人增援；另一方面又电话告知新成分局局长卓清宝，要求伊来管教部下。

卢运亨拨吃生活个情景，齐巧拨新成分局执勤警长郑宽路过个辰光看见，郑宽豪扫返回警察局报告，调来20多个青年警察赶到金都大戏院。警察们听了龚复柳讲个事体经过侪火冒三丈，敲开戏院个铁门后翁进来，一面拿卢运亨接转到新成分局去救治，一面去寻肇事个宪兵。搿帮警察从2楼寻到3楼，寻到了李豫泰搭伊手下2个宪兵迓勒海个地方，拿伊拉团团包围。房门设有屏障，警察一时头浪勿容易进去，拨包围个宪兵也呒没办法冲出来，双方侪僵持勒海。

到半夜里，卢运亨拨宪兵殴打致伤个消息，老快就传遍了附近个黄浦、老闸等几个分局。长期受到宪兵欺负个警察们难熬心头之恨，有近百人纷纷向金都大戏院赶过来相帮。就勒搿个辰光，两卡车个全副武装、荷枪实弹个宪兵也呼啸而来，立刻守牢四方路口、抢占有利地形，对包围金都大戏院个警察进行反包围。

李豫泰勒楼浪看见援兵已经到了，马上拔出手枪冲出门外，向窗外连打两枪，围观人群听到枪声后一片骚乱，纷纷东奔西跑。勒三楼包围李豫泰个警察们也不约而同个夺路奔逃，其中10多名警察逃到马路当中，截牢农民张年发个一辆运瓜卡车爬上去，想要冲出宪兵包围圈。但已经来勿及，一个宪兵用枪刺穿了运瓜卡车右前胎，警察李光正看到搿种情况跳出车厢，拨宪兵一枪击中头部，当场倒地。一时头浪，枪声密集，宪兵连开几十枪，鲜血一歇歇就染红了金都大戏院门口个路面，滚落勒地浪个西瓜搭鲜血混勒一道，地浪向血血红个一片。搿场血案最终造成死伤20几个人，当中11人遇难、其中警察李光正、张功、周金琦、翟少武、杨祖大、徐凤魁搭史文标7人当场死脱，5人受伤；无辜路人郭富民、沈荣阶、陆杏根、郭云弟4人死亡，7人受伤；宪兵只有1人受轻伤。

血案第二日，上海各大报纸侪以头条报道直指宪兵暴行，《申报》第4版以头条报道迭桩事体，标题为“金都戏院外深夜大血案警示市民死伤达16人……”。16人只是当天媒体初步统计数，而后续核实个数据，迭场血案更加惨烈。血案震动全市，舆论沸沸扬扬，宪兵团却轻描淡写拿伊定性为“误会”，迭份颠倒黑白个声明，警察彻底光火了。1947年7月28号，几十名警察分三趟冲进金都大戏院，用警棍敲坏放映机，珍贵个胶片拨撕成雪片，座椅也拨狠狠掀起来，幕布也拨点着了。迭座精致个装饰艺术派建筑，摩登个外壳勒火光中龟裂剥落，一夜之间沦为废墟。虽然后首来戏院经过修复重新开业，但早已元气大伤，以前个繁华，再也无法重现。当天上半日10点钟，黄浦、老闸、新成、嵩山、卢家湾等警察分局个交通警、巡逻警全部罢岗，上海交通指挥枢纽陷入瘫痪，交通阻塞、肇祸频频。搿场警察罢岗历时3天，迭个是上海开埠以来第一趟，彻底引发国民政府个惊慌。当天下半日，上海市长吴国桢勒市参议厅（今人民大道200号附近）召开临时参议会商讨血案处理，参议员姜豪拍案而起，痛斥当局漠视平民伤亡，强烈要求拨死难市民搭警察同等个抚恤。迭座议事厅，一时成为民意搭强权交锋个战场，而金都大戏院个名字，也从此搭民国上海宪警个地盘恩恩怨怨、权力倾轧，死死捆绑勒一道。

与此同时，勒新成分局广场宣布成立“金都大戏院警察惨案善后委员会”（简称“善委会”），警士季锐为主任委员。会浪向提出：要主持公道、惩办凶手、举行追悼会、抚恤死难者家属等条件。“善委会”一成立，就编辑出版了《伸雪报》，迭张报子由中共隐蔽战线党员蒋复强、范白萍负责编辑，前后共出版8期，每期印数达5000多份，从警局内部逐步流向社会，影响力邪气广。7月30号创刊号发刊词中提出“公理定会战胜强权”“团结就是力量”等口号，明确伊核心使命是为死难警察搭无辜市民伸冤，详细公布金都大戏院惨案个完整始末——从戏票争执个起因、宪兵殴打警员个细节，到半夜里血案惨烈场面，再到宪兵团“误会”定性个颠倒黑白，字字直指真相、字字饱含悲愤。除脱核心史实披露外，报纸还开设专栏，刊登死难警察搭无辜路人个生平事迹、家属个哭诉、控诉，收录各界人士对惨案个谴责个声音，同时连载“善委会”个诉求搭请愿进展，呼吁社会各界关注此案，施压国民政府彻查凶手、落实抚恤。同一天，罢岗暂告结束，“善委会”立即组织警察请愿，两百多名请愿代表当中，除廿多人北上南京国民政府请愿外，大部分代表分别到市政府、参议会、淞沪警备司令部请愿。市长吴国桢接待请愿代表，并根据请愿代表个要求，作出处理善后事宜个5条实施意见，承诺彻查主使犯、行凶犯，按军法惩处，并拨款抚恤受难者家属。

城是人非：建筑个消逝搭半世终章

迭只轰动一时个血案，后续处置历经波折：国防部组织军事法庭审理后，勒民国37年（1948年）1月3号签呈拨行政院院长张群签署生效，并训令上海市政府遵照执行。判决结果为：宪兵8连下士杨燮开、9连上等兵顾明辉共同杀人，各处有期徒刑8年；中尉排长李豫泰、8连上等兵吴伯良伤害人之身体，各处有期徒刑2年；上尉连长王延墓、任亚夫，8连中士班长向中麟、下士班长杨桂初4人无罪，当庭释放。而被告警员李天杰、杨句璋、李宝琛、徐剑平、郑宽、梅卓良、童荫之、梁妆源、卓清宝，因侪勿是军人身份，勿属于军法审理范围，所以不予审理。

民国37年9月23号，上海市警察局代局长俞叔平勒市参议会浪受到参议员质询辰光表示：“金都事件关于宪兵部分已勒南京审判终结，至于警察部分，将由司法机关审判。关于行政者，新成分局局长已降职，老闸、黄浦及嵩山分局也有学警参加，故对各分局局长均记大过一次。本人也有失职之处，报请市长给予处分。”

尽管有了判决结果搭仔行政处分，但当初“善委会”提出个抚恤死难者家属等承诺，最后大多流于形式，伊眼死难个平民搭仔警察，伊拉个家属并呒没得到应有个慰藉，历史个风一吹，交关细节就逐渐拨淹没。金都大戏院由著名电影实业家柳中亮、柳中浩兄弟勒1940年建成开业，是伊拉继1934年创办金城大戏院（今北京东路780号黄浦剧场）后，打造个第二只戏院。其选址颇具巧思，搭长乐路留园28号个柳氏私宅形成商业联动，戏院初期专门放映国产电影，国华影业公司出品个《孟姜女》《董小宛》等经典影片侪曾勒此地上映，为国产电影个传播添砖加瓦。1943年，戏院因营业调整转向话剧演出，《家》、《上海屋檐下》等经典剧目先后登台，让此地成为沪上话剧舞台个重要阵地。同年5月，著名话剧导演黄佐临执导个喜剧《称心如意》勒勒此地公演，表演收获了满堂喝彩，成为戏院话剧演出史浪个经典时刻。时代流转，金都大戏院个光影也换了模样。

1950年后，此地成了越剧演出个重要场所，「10月芳华越剧团」勒此地首演，此后「合作越剧团」等知名剧团也相继驻场；1955年，戏院正式更名瑞金剧场，「合作越剧团」勒此地扎根，《白蛇传》、《三笑》等经典越剧轮番上演，著名越剧表演艺术家戚雅仙、毕春芳等名家登台献艺，慢慢叫形成独树一帜个艺术流派。剧场里总归会得坐勒海一眼资深个老戏迷，一曲唱完余韵悠长，成了无数人心里向个美好回忆。

辰光来到1998年，瑞金剧场还曾经放映过经典电影《泰坦尼克号》，再度勾起老上海人个观影记忆。但好景勿长，为配合延安中路高架建设，戏院个门厅搭放映间拨拆脱了，主体建筑停用后租赁拨商户，还拿3楼改造成为桌球俱乐部。戏院遗留下来个交关帷幕、老旧个木头台子矮凳，也勿知勿觉当中种下了火灾隐患。

2010年7月，一场短时暴雨过后，桌球俱乐部先开始着火。沉闷个爆炸声后，火势借仔风力迅速蔓延，从3楼烧到4楼、5楼，滚滚浓烟弥漫到千米之外个南京西路。剧场里留存勒海个大量帷幕、木头物事侪是易燃物品，拨救火工作带来了极大困难。消防部门现场勘查初步判断着火原因是电线浸水短路，具体原因呒没正式公布，搿场火灾虽然呒没造成人员伤亡，却让剧场遭受了毁灭性打击：内部装潢搭木质结构几乎全部烧毁，只留下几面残破个墙体，彻底失去了修复意义。最终，搿座见证了上海滩半个多世纪风云个建筑拨完全拆脱，伊个原址现在已经成为延安中路沿线商业搭住宅个混合区域，唯有地名搭记忆，留存勒海伊曾经个痕迹。

搭金都大戏院个消逝勿同，当年搭血案紧密相关个两只旧址：康定路770号个宪兵队部，1963年迎来培进中学迁入，当代著名文化学者、作家、艺术理论家、散文家余秋雨，知名海派作家程乃珊，中国电影金鸡奖最佳女主角、中国电视金鹰奖最佳女演员肖雄等侪从搿搭毕业。余秋雨还为“培进”2004年转型为上海戏剧学院附属高级中学题写了新校名，迭只建筑部分保留了民国砖混结构个风貌，完成了从“军事据点”到“育人摇篮”个温柔转变。

而原来个新成警察分局主体建筑成都北路360号是1934年建成个公共租界成都路捕房搭外籍巡捕公寓，新中国成立后，伊搭新成警察分局附属办公地337号个新成大厦，隔仔成都北路相望。新成大厦居民楼勒“文革”期间俗称红卫大楼，巧合个是，搿座建筑搭原来个宪兵队总部一样也搭中学结缘，后来由静安交通队搭新风中学共用。90年代建造南北高架道路辰光，搿只区域部分建筑拆脱了，而民国建筑新成大厦作为优秀历史建筑保留了下来，成为成都北路浪一处静默个历史遗存，像勒静静讲诉过往个故事。

尾声：城市记忆个灰烬搭重生

现在个延安中路542号，早已经勿是地图浪一个冰瀴个门牌号头。勒勒搿片土地浪，层层叠仔搿三层鲜明个时代印记：民国时期个霓虹璀璨搭枪声喋血，越剧时代个水袖翩跹搭婉转唱腔，还有当下商圈潽进潽出个人气搭车水马龙。对开发商来讲，搿块土地个价值，从来勿止于“市中心个黄金区位”，更勒勒伊所承载个、无法复制个城市记忆——伊眼勒金都大戏院轧勒海看《龙凤花烛》个夜里，伊眼勒瑞金剧场追捧戚雅仙、毕春芳个戏迷，伊眼属于老上海个繁华搭温情，侪是搿片土地独有个“文脉资产”。金都大戏院、瑞金剧场虽已消逝，但伊拉承载个记忆，老早已经融入上海滩个肌肤脉络里。搿眼关于繁华、关于纷争、关于温情个片段，会勒老上海人个讲述当中，勒城市个史料里一直留存下去，成为上海搿座城市独有个历史印记。而城市个发展，也始终勒勒搿能介个记忆搭新生中，稳步前行。

作者：李榕樟

沪语讲述：孙墨涵

20世纪90年代的瑞金剧场

培进中学（上戏附中）教学楼